مقدمة
البوست ده بيشرح الخطوات القانونية لزواج مصري من اجنبية خارج مصر. تجربتي هي مع الزواج من الجنسية الاندونيسية بس الخطوات مش هتختلف كتير مع الجنسيات التانية:
الاوراق المطلوبة منك كمصري:
- شهادة ميلاد
- سجل فردي لو متجوزتش قبل كدة او سجل عائلي لو سبق ليك الجواز
- لو مسيحي محتاج شهادة خلو موانع من الكنيسة
بخصوص شهادة خلو الموانع: السفارة كل اللي يهمها ان يكون في ختم كنيسة على الورقة ايه المكتوب بالظبط في الورقة مش مهم اوي طالما العنوان هو: "شهادة خلو موانع" غير كدة متشغلش باللك
بالنسبة لشهادة الميلاد هتحتاج تختمها الاول من السجل المدني و بعدين هتحتاج تختمها من الخارجية.
بالنسبة للقيد الفردي او العائلي طلعه احسن من السجل المدني الاساسي في العباسية عشان زحمة اقل و برضو هتختمه من الخارجية.
خطوات الزواج:
- هتاخد الاوراق دي و تروح بيها لسفارة مصر في الدولة اللي عايز تتجوز فيها عشان السفارة تديلك ورقة اسمها شهادة خلو موانع.
- بعدين هتترجم شهادة ميلادك و القيد الفردي او العائلي للغة البلد و لازم طبعا تكون ترجمة معتمدة
- بالنسبة لاندونيسيا هي بتشترط زواج ديني فهتقدم الاوراق دي للمؤسسة الدينية اللي هتجوزكم جواز ديني و هتاخد منها في الاخر شهادة الجواز
- هتوثق شهادة الجواز في وزارة العدل - بتاعت الدولة الاجنبية - و بكدة انت تعتبر خلاص اتجوزت في الدولة الاجنبية
خطوات توثيق الجواز في مصر:
- هتاخد شهادة الجواز الاجنبية بعد ما ختمتها من وزارة العدل و هتختمها كمان من وزارة الخارجية - بتاعت الدولة الاجنبية - و بعدين تطلع على السفارة المصرية عشان تصدق عليها.
- لما تنزل مصر هتروح تختم وثيقة الجواز تاني من وزارة الخارجية المصرية.
- روح دار القضاء العالي و اسال على قسم الترجمة و ترجم هناك الوثيقة للغة العربية.
- هتاخد الترجمة المعتمدة من دار القضاء + الاصل و تروح وزارة العدل قسم زواج الاجانب عشان توثقة.
